Thaum lub 2 hlis tim 9 xyoo 1976, kuv tau khiav tawm tebchaws Nplog tuaj mus rau Thaib teb.  Thaum lub 2 hlis ntuj tim 27, kuv tuaj mus tshwm rau Thaib teb lub yeej thojnam Vibnais.  Kuv tuaj nrog txiv ntxawm Nom Tub nyob uake.  Lub 2 hli tim 17 xyoo 1978, kuv thiab Sua Lis wb thiaj li sib sau ua neej.  Lub sijhawm ntawm wb twb mus xamphaj uake tag lawm mam li sib yuav tom qab.  Lub 8 hli tim 26 xyoo 1978, wb thiaj li sawv kev ntawm lub zos Vibnais tuaj mus rau Bangkok.  Lub 9 hli tim 6 xyoo 1978, wb thiaj li sawv kev ntawm lub nroog Bangkok tuaj mus rau tebchaws Mekas.  Lub sijhawm ntawv, wb tus sponsor nyob rau lub zos Lubbock, lav Texas.  Wb tuaj txog tau 3 hnub xwb ces kuv twb pib mus ua  hauj lwm lawm.  Thaum ntawv lawv tsuas them $2.25 tauj ib xuajmoos rau kuv xwb. Wb tuaj nyob tau 4 lub hlis rau nram Texas, muaj kev kho siab heev wb thiaj li khiav los mus caum txiv ntxawm Nom Tub rau lub zos Wheaton, lav Illinois. 

Thaum los txog rau zos Wheaton, kuv los pib ua hauj lwm nyob rau ib lub company es lawv them ib xuajmoos $3.50 rau kuv.  Kuv ua tau muaj 3 lub hlis xwb ces kuv raug tawm lawm.  Yeeb vim kuv tau mus ko taw 3 miles mus thiab 3 miles los.  Lub sijhawm ntawv yog lub 12 hlis xyoo 1978.  Thaum kuv raug tawm lawm, kuv mam li mus pib kawm ntawv tom Ceta program tau 6 lub hlis rau Machine Tool.  Tom qab kuv kawm tiav lawm, kuv mam li mus ua hauj lwm rau ib lub company tshiab es lawv them kuv $5.75 tauj ib xuajmoos.  Uake tib xyoo no, kuv 4 tug kwv tuaj txog thiab lawv tuaj nrog kuv nyob lawm.  Lawv yog Muas, Kaus, Npuas Txos thiab Tsu.  Thaum lub 10 hli xyoo 1980, kuv thiaj li khiav tawm Wheaton los mus rau lub zos Eau Claire, lav Wisconsin. 

Thaum kuv tsiv los txog rau lub zos Eau Claire, kuv rov mus kawm ntawv dua.  Kuv mus kawm tau 1 xyoos ESL ces kuv mam li tau mus kawm career program.  Kuv kawm tag 1 xyoos rau Industrial Drafting.  Lub sijhawm no, kuv ho mus ua hauj lwm rau koomhaum Hmoob zos Eau Claire thiab.  Tom qab kuv ua tau 2 xyoo hauj lwm rau lawv, kuv thiaj ho mus kawm ntawv ntxiv rau hauv Mount Senarion College.  Kuv mus kawm tiav 4 xyoos rau major Criminal Justice.

Kuv thiab Sua wb tuaj yug tag nrho wb cov menyuam rau tebchaws Mekas teb no.  Wb muaj tag nrho yog 7 tus menyuam; 3 tug ntxhais thiab 4 tug tub. Tag nrho tsevneeg muaj 9 leej.  Kuv tsevneeg yog raws li nram qab no:

Tswv kub Xyooj

Sua Lis Xyooj

Nkauj Xyooj                tus ntxhais hlob

Keej Xyooj                   tus tub hlob

Kab Npauj Xyooj        tus ntxhais

Kiab xyooj                   tus ntxhais

Kim Xyooj                   tus tub

Kajsiab Xyooj              tus tub

Koobmeej Xyooj         tus tub

Kuv txiv hu ua Txiaj Kuam Xyooj thiab kuv niam hu ua Ntxhais Yaj.  Sua txiv hu ua Xov Txiab Lis thiab niam hu ua Iab Lauj.  Ntawm no yog wb li lis xwm ntawm wb lub neej uas tau los nyob uake tau 30 xyoo.