Tsev
|
|
|
|
Nqe 2: Ntov Xubntoos
Hais txog ntawm kev ntov xubntoos los yog ntov pobntoo, koj yuav ntov tau rau thaum hu me nyuam plig, ua tshoobkos, tis npe laus thiab lwm yam uas tsim nyog ua. Lo lus ntov zubntoos no txhais tau haistias “npws poj npws yawm”, xws li yog tej niam tej txiv, tej pogyawg thiab tej kwvtij ua tau tag simneej lawm. Thaum ua tau zaub mov siav tag lawm, koj rau ib lub rooj rau ntawm tag. Koj hais ib taig mov, ib taig nqaij thiab muab ib co diav coj los tso ncig rau ob taig zaub mov no. Tsis tas li ntawv, koj muab ib co rooj zaum los tso ncig lub rooj. Thaum rau mov zaub thiab rooj tag lawm, koj mam li los coj tsoom niamtxiv, tsoom pogyawg los noj los haus. Ua ntej ntov xubntoos, koj yuav tsum xyuas saib rooj mov no yog ua noj los vim yog dabtsi. Xws li yog ua tshoobkos, hu menyuam plig, los seb yog tis npe laus. Thaum ntov xubntoo, koj yuav tsum laig qhia kom meej rau cov ntsuj plig ntawv.
Piv txwv haistias yog koj ntov xubntoos vim tshoobkos, koj yuav tsum laig los yog ntov xubntoos li nram qab no:
“Niam no os! Hnub no zoo hnub zoo nyoog, peb mus coj tau tus ntxhais hu ua (hais nws lub npe) no los ua peb tus nyab, ces hu txog nej tsoom laus tuaj noj tuaj haus - es noj pov hwm haus pov yawm, noj ntis mob haus ntis ntsaj, ntis kua muag iab kua muag daw, mus ua tshoob ua kos los kom mus kaj mus dawb mus huv, kom hmab tsis dawm tes hlua tsis dawm taw, ces ua tau noj tau haus thiaj yawv npws yuav laig nej sawvdaws no nis.”
Nco ntsoov xub laig koj txiv phaj, koj yawg phaj, koj phaj, ces koj mam li npws laig koj cov xeebntxwv lawv phaj thiaj yog raws li pojyawm tau ua tseg los lawm. Qhov nov yog ib qho tseem ceeb heev. |
||||