Xyooj Ntsaimvab

Hais txog peb kev nta tub qua ntxhais nyob rau hauv peb cuab kwvtij Xyooj Ntsaimvab tsev, (yog thaum twg koj muaj ib tug tub mus yuav nyab los sis yog ib tug ntxhais mus yuav txiv), koj yuav tsum ua raws li qhia nram qab no:

Nyob hauv Xyooj Ntsaimvab tsevneeg no, yog haistias thaum koj muaj ib tug ntxhais sawv kev mus ua luag lwm xeem ob cag sab nrauv nyab lawm, hnub nkawv tuaj hais tshoobkos tiav lawm, peb Xyooj Ntsaimvab no tsev yog yuav tus “qaib dab” tsis yog tus “Npua Dab.” Tus qaib dab no yog tus ntxhais thiab tus vauv muab tuaj rau niamtais thiab yawmtxiv coj los laig rau pojyawm txwvtxoob. Luag hu tau haistias “npws laig pojyawm.” Yog tus ntxhais vauv tsis muaj qaib, nkawv muab nyiaj coj los tsuaj tsam xwb los tau ib yam.

Tomqab thaum hais tshoobkos tiav tag lawm, koj mam li muab tus qaib dab no los siv tau. Raws li peb txoj kevcai, koj yuav tsum tos kom tus ntxhais vauv nkawv rov qab tuaj xyuas tso mamli muab coj los tua npws laig pojyawm. Yog tus qaib dab no tseem me, koj yuav tau muab yug cia kom nws loj tso mam tua. Hos yog tus qaib dab no twb loj zoo siv lawm, ces koj tsuas yog tos kom tus ntxhais vauv nkawv rovqab tuaj xyuas xwb ces muab tua siv tau. Txoj kevcai no ces peb cov pojyawm txwvtxoob ib txwm yeej ua li no los lawm. Tus qaib dab no cia li tua xwb; tsis ua txaj txim dabtsi. Thaum muab tus qaib dab tua thiab ua siav lawm, koj rau ib lub rooj rau pem tag. Koj hais ib taig mov, ib taig nqaij qaib (uas yog tus qaib dab), rau ob-peb lub rooj zaum thiab muab ib co diav coj los tso ncig rau cov phaj zaub mov. Koj mam li hu tsoom laus xws li tej niam tej txiv uas twb tau tag simneej lawm los noj haus. Ces koj hais qhia haistias yog tus ntxhais vauv coj tuaj (qhia nkawv lub npe). Yog tias tus ntxhais vauv nkawv ho nyob deb es tuaj xyuas tsis tau koj thiab tus qaib dab no ho laus tuag lawm, nws kuj tsis muaj dabtsi ntau. Koj tos kom hnub twg nkawv tuaj xyuas, koj mam li mus nrhiav dua ib tug qaib coj los ntaus ua nkawv tug. Thaum ntawv, koj mam li muab tus qaib no coj los tua ua kevcai thiab npws laig pojyawm los yeej tau ib yam. Thaum yuav npws laig pojyawm, koj yuav tsum laig raws li cov phaj neeg uas tau tag simneej lawm. Tseem ceeb heev, koj yuav tsum npws laig kom yog raws li nram qab no:

1. Laig koj txiv lawv phaj

2. Laig koj yawg lawv phaj

3. Laig koj phaj

4. Laig koj cov xeebleej xeebntxwv lawv phaj

Txoj kevcai npws laig pojyawm yog hais raws li nram qab no:

“Niam no os! Hnub no zoo hnub hmo no zoo nyoog, tus ntxhais thiab tus vauv hu ua (hais nkawv lub npe) no coj tus qaib no tuaj thiaj hu txog nej tsoom laus tuaj noj - noj pov hwm haus pov yawm, noj ntis mob haus ntis ntsaj, ntis luag ncauj ntis luag lo, ntis sub tawg sub ntshav, ntis hleb raj hleb raws, ntis kua muag iab kua daw, kom peb ib tsev 20 leej kwv pluag toog qab ntuj dhau hauv ntuj ces tsis tseev kom hmab dawm tes hlua dawm taw, ua tau noj tau haus thiaj yawv npws yuav laig nej sawvdaws no nis.”

Tus qaib dab ces koj tsuas coj los siv tag li no xwb.