Nom Muas txiv thiab niam yog Ntxoov Nab Xyooj thiab Nplias Yaj. Nom Muas yog tus tub 3 rau ntawm lawv 6 leej kwvtij. Nyob rau hauv Ntxoov Nab tsevneeg, nws 6 tus tub yog Soob Leej, Nkaj Neeb, Nom Muas, Thaiv, Ntxuam, thiab Pheej.
Nom Muas yog yug rau thaum lub 8 hlis ntuj, tim 7, xyoo 1971, nyob rau lub zos Phuam Phu, tebchaws Nplog. Thaum yug Muas tau tsis ntev, nws tsevneeg tau khiav los mus nyob rau Haib Qhas, uas yog nyob ze rau zos Looj Ceeb. Lawv nyob rau Haib Qhas kuj tsis tau ntev, lawv ho tau khiav los mus nyob rau Naj Xoos los ua liaj ua teb tau ib ntus. Tom qab Ntxoov Nab tsevneeg tau nyob Naj Xoos tau ib ntus, lawv ho tsiv los mus nyob rau Naj Loom. Lawv tsevneeg kuj tau mus nyob rau tom hav zoov tau ib ntus thiaj mam los nyob rau tim Hav khaub uas ze rau Naj Xoom. Tom qab lawv tau ncaim lub zos Naj Xoom, lawv kuj tau los nyob rau lub zos Naj Ces tau ib ntus. Thaum lawv ncaim zos Naj Ces, lawv thiaj li hla dej tuaj mus rau sab Thaib Teb.
Thaum xyoo 1984, Nom Muas tsevneeg tau tuaj rau tebchaws America. Lawv tau tuaj nyob rau lub zos Eau Claire, Wisconsin.
Thaum lub sijhawm Nom Muas lawv tuaj txog rau tebchaws America, nws muaj 8 xyoo thiab tau tuaj kawm ntawv nyob rau lub tsev kawm ntawv hu ua Lincoln Elementary School nyob rau hoob 4. Nws yog ib tug neeg rau siab kawm ntawv heev. Tom qab nws kawm tiav elementary school, nws tau mus kawm hoob 6 txog rau hoob 8 nyob rau hauv lub tsev kawm ntawv hu ua South Middle School. Tsis ntev tom qab ntawv, Nom Muas tau mus kawm high school nyob rau hoob 9 mus txog rau hoob 12 nyob rau ntawm Memorial High School.
Thaum Nom Muas muaj 18 xyoo thiab tseem kawm high school, Nom Muas thiab Cua Yaj nkawv tau sib sau los ua neej rau thaum lub 1 hli ntuj, hnub tim 3, xyoo 1991. Cua niam thiab txiv yog Khu Muas thiab Txooj Muas Yaj. Lub sijhawm nkawv sib sau los ua neej ntawv, Nom Muas tseem kawm tsis tau tiav high school. Nws tus pojniam los kuj tseem kawm ntawv nyob rau hauv middle school thiab. Txawm tias nkawv sib sau los ua neej thaum nkawv tseem yau yau los nkawv kuj yog rau siab kawm ntawv kawg li thiab.
Tom qab nkawv sib sau los ua neej, Nom Muas nkawv ob niam txiv muaj nkawv thawj tug menyuam uas yog tus menyuam ntxhais hu ua Maivlis (Melissa) Xyooj. Tseem nkawv muaj me tub me nyuam los nkawv tseem rau rau siab ua haujlwm thiab kawm ntawv vim yog tias nkawv xav kom tau lub neej zoo nrog luag ua. Tsis tas li ntawv, nkawv xav tias nyob rau lub tebchaws vam meej no yuav tau mus kawm ntawv qib siab es thiaj li yuav pab tau nkawv tsevneeg.
Nyob rau xyoo 1995, Nom Muas thiab Cua nkawv tau mus ua xam xaj los yog citizenship, thiab nkawv tau mus hloov nkawv ob lub npe hu ua Michael Moua Xiong thiab Jennifer Choua Xiong.
Michael tau kawm tiav high school nyob rau hauv Memorial High School nyob rau lub nroog Eau Claire, Wisconsin thaum lub 6 hli ntuj, xyoo 1991. Michael tau mus kawm ntawv qib siab ntxiv nyob rau tom University of Wisconsin-Stout, Menomonie, Wisconsin thaum lub 9 hlis, xyoo 1991. Michael tus pojniam Jennifer, kawm tiav high school thaum lub 1 hlis, xyoo 1995 nyob rau tom North High School. Tom qab nws kawm tiav high school, nws tau mus kawm ntawv qib siab nyob rau tom University of Wisconsin-Stout thaum lub 1 hlis, xyoo 1995. Lub sij hawm uas nkawv ob leeg tau mus kawm ntawv lawm, nkawv kuj tau tseg nkawv cov me nyuam rau nkawv niam thiab nkawv txiv zov nyob rau hauv vaj hauv tsev, es nkawv thiaj li muaj sijhawm mus kawm ntawv.
Michael mus kawm ntawv rau tom University of Wisconsin-Stout tau 6 lub xyoo. Nws kuj tau kawm tiav nws daim Bachelor of Science Degee rau Human Development and Family Studies thaum lub 5 hlis, xyoo 1995, thiab tau tiav nws daim Masters Degree rau Family Services thaum xyoo 1998. Nws tus pojniam Jennifer los kawm tiav nws daim Bachelor of Science Degree rau Human Development and Family Studies thaum lub 5 hlis, xyoo 1998. Thiab thaum lub 8 hlis, xyoo 1999, nws tau kawm tiav nws daim Masters Degree rau Guidance and Counseling (K-12) nyob rau tom University of Wisconsin-Stout ib yam thiab.
Lub sijhawm no Nom Muas ua haujlwm pab rau cov niam thiab txiv pej xeem uas muaj cov menyuam uas raug teeb meem thiab tsis mus kawm ntaub kawm ntawv raws li txoj cai. Niam Nom Muas ua haujlwm hauv tsev kawm ntawv. Nws txoj haujlwm yog pab thiab txhawb nqa cov tub ntxhais kawm ntawv hauv high school kom lawv mus kawm ntawv qib siab tom ntej no.
Nom Muas thiab Cua nkawv muaj 7 tus menyuam, npe hu li nram no:
Melissa Maily Xiong muaj hnub nyoog 17 xyoo thiab nws kawm ntawv nyob rau hauv Memorial High School rau hoob 11. Nws nyiam ncaws pob (soccer), ntaus pob (softball) thiab nws nyiam fuab las voos (cheerleading) rau tom tsev kawm ntawv. Kristy Kasee Xiong muaj hnub nyoog 14 xyoo thiab nws kawm ntawv nyob rau hauv Memorial High School nyob rau hoob 9. Nws yog ib tug ntxhais uas nyiam ncaws pob rau hauv tsev kawm ntawv thiab. Ashley Gaoyer Xiong muaj hnub nyoog 13 xyoo, thiab nws kawm ntawv nyob rau hauv South Middle School nyob rau hoob 8. Jacqueline Gaosong Xiong muaj hnub nyoog 11 xyoos thiab kawm ntawv nyob hoob 5. Maneela Gao Ia Xiong muaj hnub nyoog 9 xyoo thiab kawm ntawv nyob hoob 3. Shania Gaona Xiong muaj hnub nyoog 5 xyoos. Isabelle Gao Ntxheeyees Xiong muaj hnub nyoog 2 xyoos.
